Кыргыз Республикасынын Саламаттыкты сактоо министрлиги 2025-жылдын жайкы туристтик мезгилинде жарандардын жана туристтердин коопсуздугун, саламаттыгын камсыздоо максатында бир катар чараларды ишке ашырууда.

       Республиканын бардык аймактарында дары-дармектердин кору түзүлүп, медициналык жабдуулардын ишке даярдыгы текшерилди, кошумча керебеттер даярдалды. Тез жардам кызматтары күнү-түнү иштеп, жүктөмү көп болгон жолдордо көчмө бригадалар нөөмөттө турушат.

Төмөнкү жолдордо тез жардам бригадалары иштеп жатат:

• Бишкек — Ош:
  – Токойлу (114 км) – 3 бригада
  – Тоо-Ашуу – 2 бригада
  – Чычкан (238 км) – 3 бригада
• Бишкек — Торугарт:
  – Боом (140 км) – 4 бригада
• Бишкек — Каракол / Энилчек:
  – Энилчек – 1 бригада

       Ысык-Көл жээгиндеги эл көп чогулган жерлерде дарыгердик пункттар иштеп жатат, анын ичинде Каракол, Балыкчы, Жети-Өгүз, Түп, Тоң жана башка райондордо.

       Ошондой эле эс алуучулар жайгашкан жайларда жана коомдук тамактануу объектилеринде санитардык-гигиеналык жана профилактикалык иш-чаралар жүргүзүлүүдө. Ысык-Көл облусунда санитардык паспорт алуу үчүн 460тан ашык кайрылуу келип түшүп, алардын көпчүлүгү каралып бүттү.

       Ушундай эле иш-чаралар жээктеги жана капчыгайлардагы боз үйлөрдү да камтыды. Эс алуу жайларында санитардык эрежелерди сактоо боюнча түшүндүрүү иштери жүргүзүлдү.

Калктын саламаттыгы үчүн жүргүзүлгөн айлана-чөйрө көзөмөлүнүн алкагында төмөнкүдөй текшерүүлөр жүргүзүлдү:

• 332 ичүүчү суунун үлгүсү,
• 128 көл суусунун үлгүсү,
• 178 кумдун үлгүсү.

        Бул иштердин баары жайкы туристтик сезондо жарандардын жана коноктордун коопсуздугу менен ыңгайлуу эс алуусун камсыздоого багытталган.

Булак: Кыргыз Республикасынын Саламаттыкты сактоо министрлиги