2026-жылдын 6-май күнү Ош эл аралык медициналык университетине медициналык билим берүү, саламаттык сактоо жана билим берүү менеджменти тармагында иш алып барган агенттиктердин жана уюмдардын өкүлдөрү иш сапары менен келишти. Коноктор үчүн университет боюнча тааныштыруу экскурсиясы уюштурулуп, окуу жана клиникалык инфраструктурасы менен тааныштырылды.

Экскурсиянын жүрүшүндө делегация өкүлдөрүнө университеттин клиникалык базалары, профилдик кафедралары, заманбап окуу аудиториялары, ошондой эле студенттердин практикалык даярдыгын камсыздоого багытталган ОСКЭ борбору көрсөтүлдү. Коноктор билим берүү процессинин уюштурулушу, окуу шарттары жана студенттер үчүн түзүлгөн мүмкүнчүлүктөр менен таанышышты.

Иш сапардын алкагында ОЭАМУ ректору Джумаев Р.М. менен расмий жолугушуу өткөрүлдү. Жолугушууда Индиядан келген чет элдик студенттерди кабыл алуу жана окутуу маселелери, студенттердин адаптациясы, ошондой эле медициналык билим берүү жаатындагы эл аралык кызматташтыкты өнүктүрүү перспективалары талкууланды.

Делегация өкүлдөрү университеттин материалдык-техникалык базасынын жогорку деңгээлин, келечектеги адистерди даярдоодогу заманбап мамилени жана ОЭАМУнун эл аралык ишмердүүлүгүнүн активдүү өнүгүшүн өзгөчө белгилешти. Ошондой эле медициналык билим берүүнүн сапатын жогорулатуу, академиялык кызматташтык жана чет өлкөлүк уюмдар менен өнөктөштүк байланыштарды чыңдоо маселелерине көңүл бурулду.

Мындай жолугушуулар эл аралык кызматташтыкты кеңейтүүгө, тажрыйба алмашууга жана Ош эл аралык медициналык университетинин аймактагы активдүү өнүгүп жаткан медициналык жогорку окуу жайларынын бири катары позициясын бекемдөөгө өбөлгө түзөт.