2026-жылдын 16-апрелинде Ош эл аралык медициналык университетинде (ОММУ) студенттердин ден соолугуна жоопкерчиликтүү мамилесин калыптандырууга жана укуктук сабаттуулугун жогорулатууга багытталган профилактикалык лекция өткөрүлдү.

    Иш-чара 1-курс студенттери үчүн уюштурулуп, Кыргыз Республикасынын укук коргоо органдарынын өкүлдөрүнүн катышуусунда өттү. Лекцияда Кыргыз Республикасынын Ички иштер министрлигинин Баңгизаттарды мыйзамсыз жүгүртүүгө каршы күрөшүү кызматынын өкүлдөрү сөз сүйлөштү:
милициянын подполковниги, алдын алуу жана коомчулук менен өз ара аракеттенүү бөлүмүнүн кызматкери — Жапакова Гульмира Жүзүбалыевна,
ошондой эле Кинология борборунун кенже тескөөчү-кинологу, милициянын прапорщиги — Айдарали уулу Нурмухамед.

    Лекциянын жүрүшүндө адистер баңгизаттардын зыяндуулугу, алардын адамдын ден соолугуна жана психикасына, айрыкча жаштарга тийгизген терс таасири тууралуу кеңири маалымат беришти. Ошондой эле Кыргыз Республикасынын мыйзамдарына ылайык баңгизаттарды сактоо, колдонуу жана таратуу үчүн каралган жоопкерчилик тууралуу түшүндүрмө берилди.

    Мындан тышкары, укук коргоо органдарынын практикалык ишмердүүлүгү тууралуу маалымат берилди. Кинолог кызматтык иттердин өзгөчөлүктөрүн жана алардын тыюу салынган заттарды аныктоодогу ролун көрсөтүп берди.

    Лекция суроо-жооп форматында өтүп, студенттер активдүү катышып, адистерден кеңири жоопторду алышты.

   ОЭАМУнун администрациясы Кыргыз Республикасынын Ички иштер министрлигинин өкүлдөрүнө кызматташтык жана жаш муундарды тарбиялоого кошкон салымы үчүн ыраазычылык билдирет.