Окуу процессинин алкагында Ош эл аралык медициналык университетинин 5-курс студенттери хирургия боюнча практикалык сабактарды алдыңкы клиникалардын базасында өтүшүүдө.

Практикага багытталган билим берүү келечектеги дарыгерлерди даярдоонун маанилүү бөлүгү болуп саналат. Сабактардын жүрүшүндө студенттер теориялык билимдерин бекемдеп гана тим болбостон, чыныгы клиникалык чөйрөдө иш алып барууга мүмкүнчүлүк алышат.

Тажрыйбалуу хирург дарыгерлердин жетекчилиги астында студенттер чыныгы операцияларга катышып, байкоо жүргүзүшөт, заманбап диагностикалык жана дарылоо ыкмалары менен таанышышат, ошондой эле операцияга чейинки жана андан кийинки бейтаптарды жүргүзүү өзгөчөлүктөрүн үйрөнүшөт.

Мындай окутуу ыкмасы клиникалык ой жүгүртүүнү, кесиптик көндүмдөрдү жана келечектеги дарыгерлик практикада ишенимдүүлүктү өнүктүрүүгө көмөк көрсөтөт.

ОЭАМУ эл аралык стандарттарга ылайык студенттерди жогорку деңгээлде даярдоону камсыз кылып, медициналык билим берүүдө заманбап ыкмаларды активдүү киргизүүнү улантууда.