2026-жылдын 7-мартында Ош эл аралык медициналык университетинде 1-курс студенттерин студенттикке кабыл алуу боюнча салтанаттуу азем болуп өттү. Бул келечектеги дарыгерлердин жашоосундагы жаңы этаптын жаркын башталышын белгилеген маанилүү жана толкунданткан окуя болду.

      Бул өзгөчө күн менен 1-курстун студенттерин университеттин ректору жана деканы жылуу куттукташты. Алар өз сөздөрүндө студенттерге окууда ийгиликтерди, максаттуулукту, өз күчүнө ишенимди жана тандаган кесибинде татыктуу жол каалашты. Университеттин атынан жаңы студенттерге эстелик белек катары салтанаттуу түрдө стетоскоптор тапшырылды. Бул алардын медицинадагы алгачкы кадамдарынын жана келечектеги кесиптик өсүшүнүн белгиси болду.

      Майрамдык программа өзгөчө жаркын жана мазмундуу өттү. Студенттер чыгармачыл жана кооз номерлерди даярдап, иш-чарага достуктун, жаштыктын жана шыктын маанайын тартуулашты. Эң эсте каларлык учурлардын бири болуп улуттук бийлер саналат. Алар университеттин көп улуттуу студенттик жамаатынын биримдигин жана маданий байлыгын даңазалады. Индиялык студенттер кыргыз бийин аткарышса, жергиликтүү студенттер индия бийин тартуулашты. Бул өз ара урматтоонун, маданий алаканын жана элдердин достугунун кооз белгиси болду. Ошондой эле сахнадан кыргыз жана индия ырлары жаңырып, майрамдык маанайды дагы да көркүнө чыгарды.

      Мүмкүнчүлүктөн пайдаланып, студенттер өздөрүнүн кураторлоруна да ыраазычылык билдиришти. Урмат-сыйдын жана ыраазычылыктын белгиси катары алар кураторлорун гүлдөрдү тапшыруу менен куттукташты. Бул таасирдүү учур иш-чаранын эң жылуу жана жүрөккө жакын эпизоддорунун бири болду.

     Аземге өзгөчө жылуулук тартуулаган дагы бир бөлүк — бул жогорку курстардын студенттеринин ак жол тилектери болду. Алар жаңы студенттерге кайрылып, окууда ийгилик, сабырдуулук, жаңы билимдер жана кызыктуу студенттик өмүр каалашты.

     Иш-чаранын алкагында Иммунология күнүнө карата уюштурулган медициналык жогорку окуу жайларынын арасындагы республикалык олимпиадада университетибизди татыктуу тааныткан студенттерге да салтанаттуу түрдө ардактуу грамоталар тапшырылды. Алар жогорку деңгээлдеги даярдыгы, жигердүүлүгү жана университеттин кадыр-баркын көтөрүүгө кошкон салымы үчүн сыйланышты.

     Мындан тышкары, ОЭАМУнун студенттери арасында өткөрүлгөн крикет боюнча мелдештин жеңүүчүлөрүнө жана байге ээлерине салтанаттуу түрдө медалдар жана сертификаттар тапшырылды. Бул сыйлыктар студенттердин өздөрүн окууда гана эмес, спортто, чыгармачылыкта жана коомдук жашоодо да мыкты көрсөтүп жатканын дагы бир жолу далилдеди.

     Студенттикке кабыл алуу аземи 1-курс студенттери үчүн чындап эле унутулгус, кубанычка, сыймыкка жана шыктанууга толгон күн болду. Бул күн ОЭАМУ — бул жөн гана билим берүү жайы эмес, салтты, колдоону, биримдикти жана жаңы жетишкендиктерге умтулукту жогору баалаган чоң жана ынтымактуу үй-бүлө экенин дагы бир жолу көрсөттү.