Ош эл аралык медициналык университетинин, клиникалык дисциплиналар кафедрасынын окутуучусу Сайед Али Аббас Рахат медицина тармагындагы лицензиялык экзаменге даярдоого арналган «NRE-2 Made Easy 2026» аттуу эл аралык окуу китебинин даярдалышына өз салымын кошту.

        Бул окуу куралы Индия жана Пакистандын, ошондой эле чет өлкөлөрдө медициналык билим алган талапкерлерине NRE-2 экзаменине ырааттуу жана түшүнүктүү форматта даярданууга көмөк көрсөтүүнү максат кылат. Китеп 2026-жылдагы талаптарга ылайык жаңыланып, негизги клиникалык темаларды өздөштүрүүнү жеңилдеткен материалдар жана практикага багытталган түшүндүрмөлөр менен камтылган.

       Мындан тышкары, Сайед Али Аббас Рахат талапкерлерге экзаменге даярданууда колдоо көрсөтүү максатында NRE-2 боюнча онлайн лекцияларды өткөрүп, темаларды системалуу түрдө түшүндүрүп, практикалык сунуштар менен бөлүшүп келет.

       Авторлордун белгилөөсүндөй, «NRE-2 Made Easy 2026» талапкерлерге өзүнө ишенимдүү даярданууга шарт түзүп, даярдык процессиндеги чыңалууну азайтууга жана жыйынтыкты жакшыртууга жардам берет.

      Эске салсак, NRE-2 (National Registration Examination Step-2) — Индияда, Пакистанда жана чет өлкөлөрдө медициналык билим алган дарыгерлердин клиникалык билимин жана практикалык көндүмдөрүн баалаган улуттук лицензиялык экзамендин экинчи баскычы болуп саналат.